اللقاء الاعلامي مع الشاعر الكبير فرح بن هذال العضيله

قالـولي انت كــويتي قـلت الاوله=الناس فكويتها ماني معـاشيها
انا سعودي وباب الرزق عند الله=واهل الجناسي تهنا في جناسيها
جنسيتي ختمها ختم ابو عبد الله=احطه فـوق راسـي وافتخر فيها
ابوي فيصل و الام الديره الفله=المملكه جعل وبل الغيث يسقيها
اللي على الدين سيس مجدها كله=السيف الاملح يطوع من يعاديها

يا قـايد القوات عزم و بتاعه=حنا تحت رهن الشاره مطيعين
اليا ومرنا الشيخ سمعٍ وطاعه=نمشي على ماقال فالعسر واللين
ياشيخ لاتمهل على القوم ساعه=كثر المماهل مانفع في فلسطين
نبا عليهم في طلعة الشمس باعه=جيشك وحراس الحدود متواصين
نبا نوخر جيشهم بندفاعه=على ولا على غير راضين
بمدراعاتٍ رميهنا وقاعه=مايطشعون الرمي للهوش ضارين
فيها هل العدات عرف وشجاعه=كلٍ يبا النوماس عند المزايين
بلادنا مامن وراهه طماعه=دون الحدود اخوان مريم معيين

حليت بالديره وضاعن الأفكار=واليوم يافتنان ويش أنت شايف
سيرت من عرض المسايير للنار=وقلبي على شرب الحشايش مهايف
واويـت وليني على زاد خطار=وإني من المسرى كثير الحسايف
نهم الصقور وعقبونا للأسوار=غير العبيد ثنين مالي ولايف
إن كان مالي عند مبروك مقدار=قدري على اللي فوق الأمات نايف
والله يالولا سبق الريش قصار=لأسري ومصباحي بعيد النذايف
أثر طرات الكيف حي ولا زار=حي بنزله يم روس الطخايف
ماهو بكيف اللي ربى مع هل الغار= لو حطلك كيف علومه خفايف
يابنت حامد بدلي ميت النار=إن كان لك بالآد شاطر حسايف
طيري كما طير من ماكره طار=لعيال ابوك اللي تجيب العرايف

علامك يالمطيري يوم تسرق ناقة العتبـان=تقسمتوا شحمها واصبحت عكتك ماليهـا
يقولون العرب طيب وراك تساعف السرقان=ذبحت الناقة اللي في الحمى الحكم حاميها

تبي تلعب بغطاس البحر يا طيب بن عدوان=تبين خلتي وانتـه فعـول العـام ناسيهـا

رزقك الله بصفراء تمترح عندك بغير عنان=غزيت الفلوه اللي في القسا واللين تعطيها

علامك يوم تدهاني وانا صافي مـع العربـان=وانا رجلي على وضح النقا ما خطت مواطيها

تصافق بك هبايب نجد وانت تطرد الغزلان=وصدت الصيده اللي جودت رجلك بياديهـا

ترانا يا جماعة ما نحب الفقش بالرمان=نبي الرمان صم وكل حبه بذرها فيهـا

هذال هذال يومنـك سرقـت البعيـر=انتم دريتوا عن الحكـام و الا رقـود
وراك ما خفيتها واناا حسبنك بصير=لين اقبضوك النشاما يالحصان العقود

يافيصل الأمر لله ثـم لـك يالاميـر=ياولد عبد العزيز الحاكم بن سعـود
انتم عفيتوا عن اللي شال حملٍ كبير=ما هو بعير بلوني به عيال القرود

اليوم أنا في روس الاقزال عديـت=ياعسر مطلاعه ومعسـر نزولـه
يانعيم بن هايف تقصيـت وأنهيـت=واقولك لك مشكور في مـا تقولـه
مدحت حمران النوظر هل الصيت=أمطير ربعي مدحهم فـي حلولـه
لكن عن بعـض القبايـل تناسيـت=أبا الصفـا وراك تنسـى فعولـه
أمطلـق الثنتيـن علـم بتثبـيـت=قدامك دغيفل بالمثـل وش يقولـه
أبا الصفا معـه العيـال النعاتيـت=ما يهزم البيرق ولأبطـال حولـه
خيالـة مثـل الجنـون العفاريـت=حــماية التاليـن فـي كـل جولـه
إن حل في تالي الركيب تصاويت=ونهض دخيـل بيرقـه وحفلولـه
صفيان أبا أمدح حيهم وأمدح الميت=حمولـة ياويهـا مـن حمـولـه

يا هلال أنا من تالي الوقت محتار=مالي جدى إلا ونتـي ونهتاتـي
اسهر طويل الليل ودير الأفكـار=الله يسـوي أيامنـا المقبـلاتـي
ذكرت ربع تكرم الضيف والجار=اللي قصر واللي يقولـون ماتـي
علومهم معـاد تذكـر فالأخبـار=يعلم بها اللـي يعلـم الخافياتـي
يا ما حلا في بيوتهم شبت النـار=العصر ولا الفجر عقب الصلاتي
من عقبهم ما فيه سجه ومسيـار=عندي تسواء الموت هو والحياتي
يا هلال ليت الدار ينشـال لـدار=اشـد لـك ولا تجينـي ثباتـي
قلوبنـا متصافيتـن بالانضـار=يا حبني للـي يسـوي سواتـي
النجر والمحماس معاد لـه كـار=ما عاد تسمـع دنتـه ياشفاتـي
غوري وثلاجة بها الناس تختار=ودلالهم في بيوتهـم موجراتـي
وراحة سوالفهم على فلـم غـوار=أفلام تجمع من جميـع الجهاتـي
وصلاة ربي عد همال الأمطـار=على النبي عـدة ليالـي حياتـي

هيض على اللي بدا القاف واختار=واختار من زين اللحون كلماتي
وقام يتفكر في زمانه وماصار=وطرت عليه علومه الاولاتي
الوقت ماش أحداً يرده إليا دار=وما قدر المولي على العبد ياتي
عبر سبيل وكب عنك التذكّار=نصيحة المسلم من الواجباتي
إليا أوحيت آذان الصبح والناس غتار=وأخذت للمسجد قليل خطواتي
تسواك يا دنيا دنانير وأنهار=ما أنتي بمامونه ولا أنتي تقاتي
ولا انتي بعيد أقرب من الكوع للزار=ولا ترحمين ولا تسدك مياتي
أسرع من الرماي لإطلاقه النار=أما فرج وإلا انطباقت رحاتي
وأنته تبا المحماس والنجر وإشعار=وأنا يكفني حداده الخواتي
على أحضر عندهن بن وبهار=وهنه يكفني جميع السواتي
وين المحل اللي نسوي به وجار=وين الحطب حتى تقولون هاتي
وراك جيرانك وقدامك القار=محدود بيتك من جميع الجهاتي
ماهي فياضٍ ما تقطع بالأمتار=وصكوكها درب المطر والنباتي
وأوراقها وأقلامها روس الأزهار=وأمان من فضل الولي والولاتي
وهذا بعد وقتٍ مقابيس الأشرار=والفقر فيه أكثر من أهل الغناتي
حلاوته ما عادلت ربع الأمرار=يسلب وينهب والعرب ما تباتي
في كل يوم ادعوا لنا عشرة اعشار=عساه ما يقبل مع المقبلاتي
آمين قولوا يا مودين الأخبار=وإلا اسمحوا لي زلتي وجهلاتي
وأخذ من اللي قلت فكرات وأنذار=وأفطن لنفسك قبل وقت المماتي
ترى حلات العمر ما غير مشوار=وإليا انتهى المشوار فات الفواتي
إليا وصل ستين ما فيهن إنكار=وصلك حدا الغياب ما به رواتي
إما وصلك الموت قصاف الأعمار=وإلا الكبر ما عاد فيه التفاتي
صفا حقوقه وانتهت عنه الأخيار=حتى القلم ما عاد يكتب دواتي

أول كلامي ذاكر الواحـد الصمـد=محصي لياليها ومحصي نهارهـا
سامع دبيب النمل في ليلة الدجـا=نرجية يوم البعث عند احتشارهـا
يقوله من غنـاء بزيـن المثايـل=يقطف من خيار المعاني خيارهـا
يامتعب اسمع جابتـي وانتبهلهـا=مثايل تعرض علـى مستشارهـا
احذر تسج الرجل من غير حاجـه=من خوف هرج طوالهامع قصارها
ومجالس الانـذال مابـه مسـره=لاتجلس الامـع نـوادر حرارهـا
عندي لسمحين الوجيـه نصيحـه=اطلب عسى الجهال تتبـع كبارهـا
الديـن دبــن الله لاتهملـونـه=خير مـن مـال تلمـه تجارهـا
هو تجـرة بالاخـره نرتجيـهـا=ينجيك من نـار تزايـد شرارهـا
أن كان يا مغرور ما تسمع النـدى=بعض هواء نفسك يزيد احتقارهـا
الدين ديـن الله عزيـز الجـلال=خمس الفـروض ادايهابعتيارهـا
مع حج بيـت الله لاصـرت قـادر=يزين يوم العيد رميـت جمارهـا
في لمة الحجاج مـن كـل ديـره=يا كم عينن فيه هلـة عبـا رهـا
والثانيـه قومـوا بحـق الـوالد=ابوك وامك زودو فـي وقارهـا
تـرى البهايـم للخلايـق دلايـل=هذي تبا طفله وذي احوارهـا
حتى وحـوش البـر يامعتبربهـا=طيور ترفاء بيضها في وكارهـا
والثالثـه لضيـف حـق واجـب=من دلتيـن زودوا فـي بهارهـا
مع ذبحة الحايل وترحيـب تنبـه=اذبح اكبار الضان وترك اصغارها
والرابعـه للجـار حـق وواجـب=الاجواد تبذل مالهـا دون جارهـا
تمت وختمها صلاتي على النبـي=عدا ماخط القلـم مـن سطارهـا